Nagpaabot og bag-ong oportunidad ang lokal nga pangagamhanan sa Caraga, Davao Oriental, alang sa mga mag-uuma pinaagi sa pagpalambo sa cattle production alang sa Wagyu beef ug sa pagtanom og sorghum nga mahimong pangunang pagkaon sa mga baka.
Kabahin niii, mibisita sa munisipyo si kanhi Department of Agriculture Secretary ug kanhi Chairman sa Mindanao Development Authority Emmanuel “Manny” Piñol aron ipaila ang maong mga oportunidad sa sektor sa agrikultura.
Lakip sa gipresentar ang paggamit sa seashells isip sagol sa pagkaon sa mga baka, nga mahimong tinubdan sa mga mineral nga gikinahanglan alang sa ilang nutrisyon. Gani, mibisita ang grupo sa Barangay San Luis aron susihon ang posibilidad sa pagtanom og sorghum sa gibanabanang 200 hangtod 300 ka ektaryang yuta.
Samtang gipasalig usab nga andam ang grupo nga maghatag og intensive training ug ipaambit ang ilang kahibalo ngadto sa mga barangay nga interesado nga moapil sa maong programa.
