Nisaka ngadto sa $5.15 bilyon ang trade deficit sa Pilipinas niadtong Septiyembre, bisan pa man sa pinakapaspas nga pagtaas sa mga export sa nakalabay nga lima ka tuig nga niabot og $9.87 bilyon (saka og 35.6%). Sumala sa Philippine Statistics Authority (PSA), kini tungod sa taas nga panginahanglan sa semiconductors nga naglangkob sa dakong bahin sa mga produktong electronic. Apan, mas paspas ang pagtubo sa mga import nga nisaka og 25.7% ngadto sa $15.03 bilyon tungod sa pagmahal sa gasolina, pagkaon, ug mga hilaw nga materyales nga naitok pa sa pagkahuyang sa piso ug gubat sa Middle East.
Sumala sa Chinabank Research ug sa mga eksperto sa ekonomiya, ang rekord nga pagtaas sa export nakadepende pag-ayo sa mga pagpamuhunan sa artificial intelligence (AI) sa semiconductor industry, samtang nagpabilin nga huyang ang ubang sektor sama sa agrikultura ug mineral. Tungod niini, nagpasidaan sila nga kinahanglang magpalain-lain (diversify) ang nasod sa uban pang kompetitibong industriya aron dili kaylap nga maapektuhan kon mobaba ang global nga panginahanglan sa teknolohiya.
Sa bahin sa panagbaligyaay tali sa ubang nasod, ang Estados Unidos ang nag-unang destinasyon sa mga produktong hinimo sa Pilipinas ($2.63 bilyon), samtang ang South Korea ($3.92 bilyon) ang nahimong pangunang gigikanan sa mga gi-import nga kargamento, nga naglabang sa China. Sa tibuok unang siyam ka buwan sa tuig, ang kabuokang trade gap sa nasod nisaka og 25.53% ngadto sa $47.16 bilyon.
Photo courtesy: The independent
