Gidasig ni Board Member Nancy S. Madjos ang mga tig-dive nga dili lamang magtagad sa katahom sa ilawom sa dagat kondili motabang usab sa pagpanalipod ug pagpreserbar sa marine environment sa Misamis Oriental.
Kini ang iyang gipasiugda atol sa 61st Regular Session sa Sangguniang Panlalawigan human mitambong ang mga representante sa Department of Tourism Region 10 ug Provincial Tourism Office aron mangayo og 800 mil pesos nga financial assistance alang sa Dive Festival nga ipahigayon sa Nobyembre 11 hangtod 15, 2026.
Matod ni Madjos, nakadawat siya og mga video ug hulagway nga nagpakita sa mga basura nga makita sa ilawom sa kadagatan nga nakuhanan sa mga divers.
Tungod niini, iyang gisugyot nga mahimong kabahin sa Dive Festival ang pagpanglimpyo sa dagat pinaagi sa pagkolekta sa mga basura aron malikayan ang kadaot sa natural nga puy-anan sa mga isda ug uban pang lamang-dagat.
Gipasiugda usab niya nga importante ang responsableng pagdumala sa basura ug dili pagpataka og labay niini aron mapanalipdan ang kadagatan alang sa umaabot nga henerasyon.
Photo courtesy: DBN Underwater Photography/ Dive Normin
