Nagpahimangno ang Cagayan de Oro City Police Office sa publiko nga siguruhon ang seguridad sa ilang mga panimalay ug establisyemento kon mobiya niini panahon sa pagbaksyon ug Kapaskohan.
Matud ni Cagayan de Oro City Police Office Spokesperson Emilita Simon atol sa Meet the Press niadtong milabay nga adlaw, usa sa mga hagit nga ilang giatubang niining mga panahona ang posibleng pagpangawat sa nagkadaiyang panimalay.
Gipasabot ni Simon nga mahimong pahimuslan sa mga kawatan ang higayon nga mobiya ang mga tag-iya sa ilang mga pinuy-anan aron sa pagtuman sa ilang mga binuhatan. Tungod niini, giawhag sa kapulisan ang publiko nga susihon ug siguruhon nga sirado ug luwas ang ilang mga balay ug establisemento sa dili pa mobiya.
Tumong niini nga panawagan nga malikayan ang pagpangawat ug mapadayon ang kalinaw ug kaluwasan sa katawhan panahon sa kapaskohan.
Photo courtesy: PNP Cagayan de Oro City Police Office
