Gihatagan ni Presidente Ferdinand Marcos Jr. og Order of Lakandula si Chief Justice Alexander Gesmundo isip pag-ila sa iyang matinud-anong pag-alagad sa nasud ug sa iyang dakong kontribusyon sa hudikatura. Gihimo ang seremonyas niadtong Miyerkules, pipila ka adlaw sa dili pa ang opisyal nga pagretiro ni Gesmundo karong Biyernes tungod sa pagkab-ot sa mandatory retirement age.
Sumala kang Palace Press Officer Claire Castro, ang Order of Lakandula nga may ranggo nga Grand Cross usa ka presidential award nga nagpakita sa mahinungdanong kontribusyon sa usa ka indibidwal alang sa nasud. Giila usab ni Marcos ang mga reporma nga gipasiugdahan ni Gesmundo sa hudikatura, ilabina ang pagpalambo ug modernisasyon sa sistema sa hustisya, lakip na ang paggamit sa electronic notarization.
Samtang, gipahibalo ni Castro nga ipahibalo ni Presidente Marcos sulod niining semanaha ang mopuli kang Gesmundo isip Chief Justice sa Korte Suprema. Lima ka Associate Justice ang naapil sa shortlist nga gisumite ngadto sa Presidente alang sa pagpili sa sunod nga mangulo sa hudikatura. Matud pa ni Castro, ang matag kandidato adunay tagsa-tagsa ka abilidad ug integridad nga gikonsiderar alang sa maong taas nga posisyon.
Photo courtesy: PNA
