Magpasaka ang National Bureau of Investigation (NBI) og tukmang kaso ang mga responsable sa kontrobersyal nga pet crematorium sa Bacoor City, Cavite, human nadiskobrehan ang 29 ka patay nga hayop nga gibiyaan sa San Jose del Monte, Bulacan.
Giimbestigahan karon sa ahensya ang giingong pagpangilad sa mga pet owner nga mibayad alang sa cremation apan gilabay lamang ang patay nilang mga binuhi.
Matod ni NBI Director Atty. Melvin Matibag, gisusi na sa ahensya ang posibleng pagpahamtang og kasong estafa batok sa mga nalambigit, depende sa makolektang ebidensya.
Tungod niini, giawhag ang mga posibleng nabiktima nga mosumite sa ilang mga resibo, sertipiko sa cremation ug uban pang dokumento aron mapalig-on ang imbestigasyon ug mapanagot ang mga responsable.
