Temporaryong dili tugotan ang mga turista ug bisita nga makasulod sa viewing deck sa Maria Cristina Falls nga nahimutang sa Barangay Maria Cristina, Iligan City sugod Nobyembre 4, 2026, hangtod sa mopagawas og bag-ong pahibalo ang hingtungdang mga otoridad.
Kini human sugdan ang proyekto sa Department of Public Works and Highways (DPWH) diha sa Agus 6 Access Road nga nagpadulong sa bantugang Maria Cristina Falls.
Sumala sa advisory, gikinahanglan ang temporaryong pagsira sa maong pasyalan aron maseguro ang kaluwasan sa mga turista, bisita, personnel ug mga trabahante samtang ginahimo ang mga kalihokan kalabot sa proyekto.
Wala pa usab magtakda og petsa ang management kon kanus-a tukmang maablihan pag-usab ang viewing deck. Gipasabot nga magpagawas pa sila og laing pahibalo sa higayon nga makompleto na ang gikinahanglang trabaho ug masiguro nga luwas na ang maong lugar alang sa publiko.
Gihangyo usab ang pagsabot ug kooperasyon sa publiko ug sa mga turistang nagplanong mobisita sa Maria Cristina Fallss ug giawhag ang tanan nga mosunod sa pahimangno ug likayan una ang pag-adto sa viewing deck hangtod sa opisyal nga pagpahibalo sa pag-abli niini.
Photo courtesy: Iligan City Tourism
