Gipahibalo sa lokal nga panggamhanan sa Ipil pinaagi sa Ipil Tourism Office ang pagpahigayon pag-usab sa Ipil Christmas Night Market isip kabahin sa pagpangandam alang sa umaabot nga selebrasyon sa Pasko.
Pinaagi niini nga kalihokan, gihatagan og oportunidad ang mga lokal nga negosyante ug mga interesado nga vendors nga makapamaligya ug makapaila sa ilang mga produkto, ilabi na ang nagkalainlaing klase sa pagkaon ug uban pang lokal nga baligya.
Dili lamang kini gitumong aron makahatag og dugang kalingawan ug kalihokan sa mga pamilya panahon sa Pasko, kondili usa usab ka paagi sa pagpalig-on sa lokal nga panginabuhian ug paghatag og dugang oportunidad sa gagmay nga negosyo sa lungsod.
Giawhag usab ang tanang interesado nga vendors nga mobisita sa Ipil Tourism Office aron makakuha sa mga kinahanglanon sa aplikasyon ug dugang impormasyon kalabot sa ilang pag-apil sa Christmas Night Market.
