Nagkahiusa ang mga bise mayor ug mga representante gikan sa 20 ka munisipyo ug duha ka dakbayan sa Bukidnon aron hisgutan ang mga pamaagi sa pagpalig-on sa kaluwasan ug seguridad sa mga tunghaan sa tibuok probinsya.
Ang maong diskusyon nahitabo atol sa regular nga monthly meeting sa Vice Mayors’ League of the Philippines (VMLP) Bukidnon Chapter nga gipahigayon sa Heritage Park, Barangay Tankulan, Manolo Fortich niadtong Oktubre 21, 2026, diin ang lokal nga panggamhanan sa maong lungsod maoy nagsilbing host sa kalihokan.
Sa maong tigum, gipahigayon ang pagpaambit sa mga estratehiya sa pag-atubang sa mga emerhensya ug insidente nga posibleng makahulga sa kaluwasan sa mga estudyante. Gipasiugda ni Mayor Rogelio N. Quiño ang maayong pagmando ug pang-gobyerno isip prayoridad sa iyang walo ka punto nga agenda, habig sa pagsuportar sa komunidad.
Samtang, gipresentar usab ni Dr. Nancy B. Panistante gikan sa DepEd Bukidnon ang mga inisyatiba sama sa Project Protect, Junior Emergency Rescue Unit (JERU), ug Scouting aron mapalig-on ang kaandam ug pagtubag sa mga emerhensya. Pinaagi niining maong panagtigum, gilauman nga mas molig-on pa ang koordinasyon tali sa mga LGU ug sa sektor sa edukasyon alang sa luwas nga palibot sa pagkat-on sa mga kabatan-onan sa Bukidnon.
Photo courtesy: LGU – Manolo Fortich
