Gipahigayon ang seremonya sa pagpirma sa Memorandum of Agreement kun MOA tali sa Lupon District Jail ug Davao Oriental Polytechnic Institute kun DOPI didto sa New LDJ Multi-Purpose Hall sa munisipyo sa Lupon, Davao Oriental.
Tumong sa maong kalihokan nga mapalig-on ang panag-alayon tali sa duha ka institusyon alang sa kaayohan, personal nga kalamboan, pagpauswag sa kahanas ug rehabilitasyon sa mga Persons Deprived of Liberty (PDL).
Pinaagi niini, gilauman nga mahatagan og dugang kahigayonan ang mga PDL nga makakat-on og mga bag-ong kahanas ug makabenepisyo sa mga programa nga makatabang kanila sa pagpangandam alang sa ilang pagbalik sa katilingban.
Gipasalig usab sa Lupon District Jail nga magpadayon sila sa pagpalambo ug pagpatuman sa susamang mga programa ug inisyatibo isip kabahin sa ilang paningkamot nga masuportahan ang hingpit nga rehabilitasyon ug maayong kaugmaon sa mga PDL.
Photo courtesy: LDJ
