Gipalig-on sa Davao Oriental Internal Affairs Service ang kampanya batok sa mga pulis nga nalambigit sa pag-abuso sa ilang katungdanan ug paglapas sa mga lagda sa kapulisan.
Personal nga mibisita sa estasyon sa Juander Radyo Mati si PMAJ Dante B. Romero, Officer-in-Charge sa Davao Oriental Internal Affairs Service, aron ipaambit ang mga programa ug paningkamot sa ilang opisina alang sa pagpalig-on sa disiplina, integridad ug responsibilidad sa mga kapulisan.
Gipasiugda sa maong pagbisita ang kamahinungdanon sa pagdawat ug pagtagad sa mga reklamo batok sa mga pulis nga giingong nalambigit sa dili maayong pamatasan, pag-abuso sa gahom ug uban pang kalapasan sa ilang katungdanan.
Tumong usab sa Internal Affairs Service nga masiguro nga ang matag reklamo mahatagan og tukmang imbestigasyon ug aksyon subay sa balaod ug mga lagda sa Philippine National Police. Pinaagi niini, gilauman nga mas mapalig-on ang pagsalig sa publiko sa kapulisan ug mapahinumdoman ang matag pulis nga ang ilang katungdanan mao ang pagpanalipod ug pagserbisyo sa katawhan, dili ang paggamit sa ilang awtoridad alang sa personal nga interes.
Photo courtesy: JRM
