Gihatagan og pasidungog si Davao de Oro Governor Raul “RM” Mabanglo pinaagi sa Global Heroes Award for Governorship – Excellence in Good Governance atol sa Climate Neutral Awards Asia and the Pacific 2026 nga gipahigayon niadtong Oktubre 30 sa Okada Manila, Parañaque City.
Pinaagi sa maong award, giila ang iyang liderato ug mga inisyatiba sa Provincial Government of Davao de Oro sa pagpalig-on sa maayong panggobyerno, pagpanalipod sa kinaiyahan, pagpalambo sa climate resilience ug pagpatuman sa mga programa alang sa kalamboan sa probinsya.
Sa iyang acceptance speech, gipasiugda ni Mabanglo nga dili lamang kini personal nga pasidungog alang kaniya, kondili kadaugan usab sa katawhan sa Davao de Oro nga padayong nagsuporta sa mga programa sa iyang administrasyon.
Gipasalig usab sa gobernador ang pagpalig-on sa mga prayoridad nga programa sa edukasyon, panglawas, agrikultura, turismo, imprastraktura, kalinaw ug kahapsay, disaster resilience ug gender-responsive governance alang sa kaayohan sa mga Dabawenyo sa probinsya.
