Nadakpan sa mga personahe sa Ormoc City Police Station 6 (OCPS6) ang tulo ka indibidwal nga giilang sila alyas “Emi,” 38 anyos, residente sa Barangay Can-untog; alyas “Peri,” 42 anyos, residente sa Barangay Sumangga; ug alyas “Opong,” 61 anyos, residente sa Barangay Can-untog, Ormoc City, atol sa operasyon batok sa ilegal nga sabong didto sa Purok 2, Barangay Can-untog, Ormoc City niadtong nakalabay nga adlaw.
Ang tulo ka nadakpan anaa karon sa kustodiya sa kapulisan samtang nagpadayon ang dokumentasyon ug pag-andam sa tukmang mga kaso batok kanila tungod sa giingong paglapas sa Presidential Decree No. 449 o Cockfighting Law of 1974.
Sa iyang pahayag, gipasiugda ni PMAJ Barrios nga ang kampanya batok sa ilegal nga sugal dili lamang kabahin sa pagpatuman sa balaod, kondili usa usab ka lakang aron mapanalipdan ang mga pamilya ug malikayan ang mga kalihokan nga mahimong mosangpot sa mas dagkong problema sa komunidad.
Giawhag usab sa OCPS6 ang publiko nga makigtambayayong sa kapulisan pinaagi sa pagreport sa mga kadudahang kalihokan ug paglapas sa balaod pinaagi sa Unified 911 aron mapadayon ang kalinaw ug kahapsay sa komunidad.
Photo courtesy: OCPS 6
