Nagpahigayon ang Department of Health – Eastern Visayas Center for Health Development (DOH-EV CHD) og Caravan for Indigenous Peoples (IPs) Health, isip kabahin sa pagsaulog sa National Indigenous Peoples Month didto sa Layao Resort, Marabut, Samar niadtong nakalabay nga adlaw.
Gipangulohan ni Senior Health Program Officer Arlyn Perlado, kauban si Samar Provincial Health Team Leader Dr. Ludina L. Insigne, ang kalihokan diin miapil usab ang nagkalainlaing ahensya sa gobyerno aron makahatod og mga serbisyong panglawas ug uban pang hinungdanong tabang ngadto sa mga lumad nga Mamanwa gikan sa mga lungsod sa Sta. Rita, Marabut ug Basey, Samar.
Lakip sa mga serbisyong gitanyag ang pagsusi sa panan-aw, pag-apod-apod og libreng antipara ug konsultasyong medikal aron matubag ang pipila sa panginahanglan sa panglawas sa komunidad.
Kauban ang Department of Social Welfare and Development (DSWD), Technical Education and Skills Development Authority (TESDA) ug pipila ka lokal nga pangagamhanan sa Samar, naghatag usab og libreng pagpagupit, pagpahamis sa kuko sa kamot ug tiil, pagtambag ug uban pang serbisyo.
Dili lamang paghatag og mga serbisyo ang tumong sa maong kalihokan, kondili pagpamatuod usab sa pagtagad, pag-ila ug paghatag og bili sa mga katutubong komunidad. Ang matag tawo, bisan unsa pa ang gigikanan ug pagkatawo, adunay katungod nga makadawat og dekalidad, barato ug patas nga serbisyong panglawas.
Photo courtesy: DOH Eastern Samar
