Giawhag sa Land Transportation Office (LTO) Davao de Oro ang mga tag-iya sa motorsiklo ug uban pang sakyanan nga wala pa maka-renew sa ilang rehistro nga sundon ang gihatag nga grace period. Ubos sa bag-ong memorandum sa LTO National, hangtod Disyembre 29, 2026 ang palugit sa pag-renew sa mga rehistro nga na-expire niadtong bulan sa Hulyo ug Agosto.
Ang mga na-expire sa bulan sa Setyembre adunay hangtod Enero 27, 2027, samtang Pebrero 26, 2027 ang katapusang adlaw alang sa mga rehistro nga ma-expire sa bulan sa Oktubre. Gipahibalo kini ni Administrative Officer III Vernon Canda,sa LTO Davao de Oro, atol sa pakighinabi kaniya sa Juander Radyo News Team niadtong Nobyembre 3, 2026.
Gipahinumdoman ang mga motorista nga ayohon dayon ang ilang mga papeles ug dili hulaton ang katapusang petsa aron malikayan ang kalangan sa pagproseso sa rehistro.
