Wala na kaikyas pa sa mga otoridad ang usa ka lalaki atol sa gikasang buy-bust operation didto sa Sitio Baliwagan, Brgy. San antonio, Cateel, Davao Oriental. pasado ala 01:45 sa kadlawon niadtong nakalabay nga adlaw.
Ang operasyon gihimo sa mga personahe sa Cateel Municipal Police Station, kauban ang mga sakop sa PDEA, PDEU/SOT DOPPO ug uban pang mga operatiba nga miresulta sa pagdakop ni alyas “FIGHTER”, 22 anyos, ulitawo, usa ka construction worker ug lumolopyo sa Sitio Tinimbo, Barangay Poblacion sa maong munisipyo.
Ang suspek nadakpan human nakuhaan ug upat ka heat-sealed nga plastic sachet sa gituohang shabu nga gibana banaang mutimbang sa 0.3 gramos ug adunay standard drug price nga P2, 040.00 ug nasakmit usab ang usa ka PHP 500 nga buy bust money.
Giimbentaryo ug gimarkahan sa lugar ang mga nakumpiskang ebidensya uban sa suspetsado ug sa mga testigo. Kasamtangang gibalhog ang dinakpan sa Cateel Municipal Police Station alang sa tukmang lakang ug mag atubang sa kasong paglapas sa RA 9165 kun Comprehensive Dangerous Drugs Act of 2002.
Photo courtesy: Cateel MPS
