Gilaumang moabot sa 42-bilyong dolyar ang gross merchandise value o GMV sa digital economy sa Pilipinas karong 2026 subay sa bag-ong report sa Google, Temasek ug Bain & Company. Nagpasabot kini og 15-percent nga pagtubo kumpara sa 36-bilyong dolyar nga natala niadtong 2025.
Base sa ika-11 nga e-Conomy SEA Report ang pag-uswag gidasig sa pagpalapad sa online shopping, digital payments ug paggamit sa artificial intelligence o AI sa adlaw-adlaw nga kalihokan sa mga Pilipino. Gilaumang motubo og 15-percent ang e-commerce o online shopping ug moabot sa 28-bilyong dolyar ang kantidad sa mga transaksyon niini.
Samtang, gipaabot usab nga mosaka sa 194-bilyong dolyar ang kinatibuk-ang kantidad sa digital payment transactions nga nagpakita sa nagkadakong paggamit sa elektronikong pagbayad sa nasud.
Matud sa report naghatag kini og dugang oportunidad sa mga negosyo nga mapalapad ang ilang merkado pinaagi sa digital platforms ug bag-ong teknolohiya. Gipasiugda usab ang panginahanglan sa pagpalig-on sa pagsalig ug kahibalo sa publiko sa paggamit sa digital services.
Photo courtesy: Access Partnership
