Gipalig-on sa lokal nga panggamhanan sa Libona ang kahibalo ug kahanas sa mga lokal nga mag-uuma bahin sa produksyon ug pagdumala sa ube isip dugang oportunidad sa panginabuhian ug pagpataas sa ilang kita.
Ang maong pagbansay gipahigayon niadtong Oktubre 30, 2026 sa New Municipal Conference Hall sa pagpanguna sa Municipal Agriculture Office (MAO), diin gitambongan kini sa mga miyembro gikan sa nagkalain-laing asosasyon ug kooperatiba sa mga mag-uuma sa lungsod.
Nagsilbing resource speaker sa kalihokan si Rhiner Rances Dadang, kinsa nipaambit sa iyang mga kasinatian ug praktikal nga pamaagi sa hustong pagpananom ug pag-atiman sa ube sa matag hugna sa produksyon, lakip na ang pag-andam sa yuta.
Tumong sa maong inisyatiba nga mapalambo ang kalidad ug gidaghanon sa ani sa mga mag-uuma. Nitambong usab ang mga kawani sa Public Employment Service Office (PESO) aron tun-an ang potensyal sa pagpananom og ube pinaagi sa usa ka feasibility study, nga gilaumang makatabang sa pagpalig-on sa ekonomiya ug panginabuhian sa sektor sa agrikultura sa Libona.
Photo courtesy: LGU Libona
