Naglunsad og synchronized checkpoint operation ang Barangay Public Safety Officers (BPSO) sa Barangay Aglayan, Malaybalay City aron mapalig-on ang kalinaw ug masiguro ang kaluwasan sa mga motorista ug pedestrian.
Sa maong operasyon, gitutokan sa mga barangay tanod ang pagmonitor sa mga sakyanan, pag-ila sa mga paglapas sa balaod sa trapiko, ug ang pagpugong sa delikadong pagdrayb aron makalikay sa mga disgrasya sa dalan.
Ang maong inisyatibo gipahigayon pinaagi sa paningkamot ni City Councilor Julius Manghano, ang Chairperson sa Committee on Peace and Order, aron mas mapalig-on ang koordinasyon sa mga barangay personnel ug sa mga hingtungdang ahensya.
Gipahibalo usab nga 20 ka BPSO sa Barangay Aglayan ang opisyal nga gideputize sa Land Transportation Office (LTO) ug Traffic Management Center (TMC), diin gihatagan sila og awtoridad nga mag-isyu og Temporary Operator’s Permit (TOP) sa mga makahimo og paglapas sa trapiko. Tungod niini, gihangyo ang tanang motorista nga motuman sa balaod ug makigtambayayong sa mga awtoridad alang sa kahapsay sa komunidad.
Photo courtesy: Barangay Aglayan/FB
