Nasakpan sa kapulisan ang usa ka 39-anyos nga lalaki human nakuhaan og illegal nga droga samtang padulong untang mubisita sa Old Public Cemetery sa Purok 4, Barangay Poblacion, Valencia City, Bukidnon kagahapong adlawa, Nobyembre 2, 2026, sa alas 7:55 sa buntag.
Ang pagkadakop nahitabo atol sa gipahigayong inspeksyon sa bag sa mga personahe sa Valencia City Police Station nga nagpabilin sa maong dapit aron masiguro ang kalinaw ug seguridad sa pagsaulog sa Kalag-Kalag.
Nakumpiska gikan sa bag sa suspek ang duha ka plastik nga pakete sa gituohang pinauga nga dahon sa marijuana nga adunay gibug-aton nga 3 ka gramo ug gibanabana nga nagkantidad og Php 360.00 base sa Standard Drug Price.
Sa kasamtangan, ang dinakpan anaa na sa kustodiya sa Valencia City Police Station alang sa dokumentasyon samtang gihikay na ang kasong paglapas sa Seksyon 11, Article II sa Republic Act 9165 (Comprehensive Dangerous Drugs Act of 2002), ug ang mga ebidensya gidala na sa Bukidnon Provincial Forensic Unit alang sa dugang eksaminasyon.
Photo courtesy: Valencia City Police Station
