Nakarekord og duha ka malampusong operasyon batok sa smuggling ang Zamboanga Sibugay Police Provincial Office o ZSBPPO niadtong Nobyembre 2, 2026, isip kabahin sa ilang gipakusgang kampanya batok sa pagsulod ug pag-apod-apod sa mga ilegal nga produkto sa probinsya.
Gipahigayon sa Mabuhay ug Alicia Municipal Police Stations ang managlahing operasyon batok sa tanang porma sa smuggling, lakip na ang inspeksyon sa mga establisementong pangnegosyo, nga miresulta sa pagkakumpiskar sa mga kontrabandong sigarilyo.
Base sa taho sa kapulisan, mokabat sa 15,400 pesos ang gibanabanang kantidad sa mga nasakmit nga sigarilyo, sumala sa presyo nga gigamit sa Bureau of Customs. Gidala ang tanang nakumpiskar nga mga produkto ngadto sa tagsa-tagsa ka Municipal Police Station alang sa dokumentasyon ug hustong disposisyon sa dili pa kini iturn-over sa Bureau of Customs.
Gipasiugda ni ZSBPPO Provincial Director PCOL Barnard Danie V. Dasugo nga magpadayon ang ilang gipakusgang operasyon aron mapugngan ang pagdaghan sa ilegal nga mga produkto, mapanalipdan ang lokal nga ekonomiya ug masiguro ang patas nga patigayon sulod sa probinsya.
