Nadakpan ang usa ka hamtong nga lalaki atol sa gipahigayong drug buy-bust operation sa kapulisan sa Barangay Dacanay, lungsod sa Siay, Zamboanga Sibugay, pasado alas 11:40 sa buntag niadtong Nobyembre 2, 2026.
Gipahigayon ang operasyon sa Siay Municipal Police Station Drug Enforcement Team o SDET, kauban ang mga elemento sa 106th Infantry Battalion, Philippine Army, Regional Mobile Force Battalion 9 ug Zamboanga Sibugay Maritime Police Station. Ang nadakpan usa ka ulitawo ug residente sa Barangay Balingasan, Siay.
Nakuha gikan sa suspek ang lima ka heat-sealed transparent plastic sachet nga adunay puti nga crystalline substance nga gituohang shabu, nga adunay gibana-banang kinatibuk-ang gibug-aton nga usa ka gramo ug standard drug price nga unom ka libo ug walo ka gatos pesos. Nasakmit usab ang 500-pesos nga buy-bust money, duha ka lukot nga aluminum foil.
Gidala ang nadakpan sa Siay Municipal Police Station alang sa hustong disposisyon, samtang ang mga nakumpiskar nga ilegal nga droga ipadala sa Zamboanga Sibugay Provincial Forensic Unit alang sa laboratory examination. Gipahigayon usab ang pagmarka ug imbentaryo sa mga ebidensya diha mismo sa lugar, nga gisaksihan sa usa ka barangay kagawad ug representante sa media.
