Gipadayag ni National Bureau of Investigation (NBI) Director Melvin Matibag ang paglaum nga aduna’y dakong tsansa nga matultolan ug madakpan ra sa dili madugay si Senador Ronald “Bato” dela Rosa.
Sa usa ka ambush interview niadtong Huwebes, gipadayag ni Matibag nga mahimong magpahigayon na og mga operasyon ang mga awtoridad sa bisan unsang adlaw subay sa mga natigum nga intelligence report aron masuta ug malimpyohan ang mga lugar nga posibleng gitagoan sa senador. Dugang pa sa opisyal, lig-on ang ilang pagtuo nga nagpabilin pa sa tibuok Pilipinas si Dela Rosa, diin wala usab gisalikway ang posibilidad nga anaa kini sa pikas bahin sa Mindanao.
Ang warrant of arrest batok kang Dela Rosa gipagawas sa International Criminal Court (ICC) kabahin sa kontrobersyal nga war on drugs sa administrasyon ni kanhi Presidente Rodrigo Duterte, diin nagsilbi si Dela Rosa isip Chief sa Philippine National Police (PNP). Pagkakaron, nagpagawas na ang Department of the Interior and Local Government (DILG) sa panguna ni Secretary Jonvic Remulla og ₱50-milyon nga ganti alang sa makahatag og impormasyon sa iyang kadakpan samtang padayon ang pakigsulti sa pundok nga nagatago kaniya aron malikayan ang bisan unsang violenteng nga panag-atbang.
Photo courtesy: NBI
