Gibundakan sa kusog nga ulan ang Florida, Estados Unidos resulta nga gipasiugda sa mga otoridad ang pagbalhin sa pipila ka polling stations sa dili pa ang Election Day tungod sa kabalaka sa kaluwasan sa mga botante ug election workers.
Gideklarar ni Florida Governor Ron DeSantis ang state of emergency sa pito ka mga county daplin sa Atlantic Coast human makasinati ang maong rehiyon og grabeng pag-ulan nga giila nga usa sa pinakataas nga natala sa kasaysayan niini.
Siyam ka polling locations sa St. Lucie ug Brevard counties ang gibalhin tungod sa hulga sa pagbaha. Lakip sa pinakagrabeng naapektuhan ang Palm Bay, tungod niini gilusad gilayon ang mga water rescue operation ug pagbakwit sa mga residente.
Sumala sa National Weather Service, aduna pay mga dalan nga dili maagian tungod sa grabeng pagbaha, ug gilauman nga molungtad pa og pipila ka adlaw ang pagbangon sa pipila ka lugar.
Samtang, grabeng pagbaha usab ang nakaapekto sa pipila ka bahin sa Arizona, Utah ug Colorado human miigo ang kusog nga bagyo gikan sa Pacific Ocean.
Duha na ang gikatahong namatay sa Flagstaff, Arizona, samtang nagdeklara usab og state of emergency ang mga otoridad sa Arizona ug Utah aron mapadali ang paghatag og tabang sa mga apektadong komunidad.
Photo courtesy: Yahoo
