Paspas ang pagsaka sa rice exports sa Cambodia tungod sa nagkadako nga panginahanglan sa maong nasud. Sumala sa US Department of Agriculture (USDA), ang Pilipinas nahimong pinakadakong merkado sa Cambodia alang sa milled rice sulod sa ASEAN region karong 2026.
Base sa report sa USDA, mikabat sa 122,102 metric tons ang milled rice nga gi-import sa Pilipinas gikan sa Cambodia gikan Enero hangtod Agosto 2026. Dako kini nga kalainan kumpara sa 3,500 metric tons lamang sa tibuok tuig 2025.
Samtang misaka ang shipments sa milled rice ngadto sa Pilipinas, mikunhod usab og 13 porsyento ang exports sa paddy rice sa Cambodia ngadto sa Vietnam sulod sa unang upat ka bulan sa tuig. Kaniadto, ang Vietnam maoy mopalit og hilaw nga palay gikan sa Cambodia, iproseso kini sa ilang mga rice mill, ug i-export pag-usab ang nahimong bugas ngadto sa Pilipinas.
Apan, sumala sa USDA, nag-usab na ang pamaagi sa Pilipinas sa pag-import pinaagi sa pagkuha diretso sa milled rice gikan sa Cambodia imbes nga magsalig sa Vietnam isip tigproseso ug tigbaligya. Tungod niini, mikunhod ang panginahanglan sa mga rice mill sa Vietnam sa Cambodian paddy rice.
Gipahayag usab sa USDA nga pinaagi sa pag-export og milled rice imbes nga hilaw nga palay, mas dako ang value nga makuha sa Cambodian rice millers sa supply chain. Nakatabang usab ang dagkong orders gikan sa Pilipinas aron mapakunhod ang gasto matag tonelada ug mapadali ang delivery kumpara sa containerized cargo.
Dugang pa sa report, adunay laing 87,344 metric tons nga na-kontrata na alang sa delivery ngadto sa Pilipinas gikan Septyembre hangtod Disyembre. Kung matuman kini, mahimong moabot sa mga 209,000 metric tons ang kinatibuk-ang rice shipments gikan sa Cambodia ngadto sa Pilipinas karong 2026.
Matod sa USDA, nakatabang usab sa maong trade ang mas dako nga import allocations sa Pilipinas ug government-backed credit. Apan, posibleng hinay-hinay ang dugang pag-uswag sa Cambodian rice exports ug magdepende kini sa ilang abilidad sa pagpadayon sa kompetitibong presyo.
Photo courtesy:Cambodianess
