Nanawagan ang CDO Skateboarding Community alang sa pagtukod og skatepark sa siyudad aron adunay luwas ug tukmang lugar ang mga skater nga mahimong venue sa ilang pagbansay ug pagpalambo sa talento. Matod ni Garren Pol Garrido, presidente sa grupo, dili krimen ang pagdula og skateboard, apan, usa kini ka sport nga naghatag og oportunidad sa mga batan-on nga mapakita ang ilang abilidad.
Kahinumduman nga sentro sa diskusyon ang skateboarding human sa pagpang-abong sa mga awtoridad batok sa mga skater nga nagdula sa Misamis Oriental Capital Grounds. Tungod niini, gipasiugda ni Garrido nga importante ang pagbaton og skatepark aron masiguro ang kaluwasan sa mga skater, malikayan ang kadaot sa mga pampublikong imprastruktura, ug mahatagan sila og tukmang lugar alang sa pagbansay.
Samtang, nahimong plataporma ang Skate 4 Goldtown event alang sa mga batan-ong magdudula nga makapakita sa ilang talento ug kahanas pinaagi sa nagkadaiyang kategorya sa skateboarding. Lakip sa mga nakigbahin si Alrey Codilla Toring, usa ka one-legged skater gikan sa Iligan City nga nakasalmot na usab sa mga kompetisyon sa kaulohan, nga nagpakita sa pagka-inclusive sa sport.
Dugang pa, tumong sa CDO Skateboarding Community nga makahulma og mga atleta gikan sa siyudad nga mahimong representante sa lokal, nasyonal ug internasyonal nga mga kompetisyon, ilabina kay apil na ang skateboarding sa Olympic Games. Alang kang Garrido, dako ang potensyal sa mga lokal nga skater, apan gikinahanglan ang suporta ug tukmang pasilidad aron mas mapalambo ang ilang talento ug makab-ot ang ilang mga pangandoy.
