Nasikop ang usa ka 51-anyos nga lalaki human nasakmit sa kapolisan ang usa ka .38 caliber nga rebolber ug tulo ka buhing bala atol sa pagpatuman sa search warrant sa Sitio Sto. Rosario, Barangay Dunggoan, Dakbayan sa Danao, Sugbo.
Gipahigayon ang operasyon sa mga sakop sa Danao City Police Station pinasikad sa search warrant nga giisyu sa Regional Trial Court Branch 90 sa Danao City tungod sa giingong paglapas sa Republic Act No. 10591 o Comprehensive Firearms and Ammunition Regulation Act.
Narekober sa mga pulis ang usa ka itom nga .38 caliber nga rebolber ug tulo ka buhing bala sa samang kalibre. Gimarkahan ug gisiguro ang mga nakuhang armas isip ebidensiya.
Hapsay ug malinawon nga nahimo ang operasyon atubangan sa lalaki nga giserbisyohan sa warrant, usa ka barangay kagawad ug duha ka barangay tanod.
Gihingusgan ni Cebu Police Provincial Office Director PCOL Abubakar Udang Mangelen Jr. ang kamahinungdanon sa pagpatuman sa balaod kabahin sa mga armas aron mapugngan ang ilegal nga pagpanag-iya ug posibleng sayop nga paggamit niini.
Photo Courtesy: PNP Cebu Police Provincial Office
