Nakipagpulong si Irish Ambassador to the Philippines Emma Hickey kay Moro Islamic Liberation Front o MILF Central Committee Chairman Al Haj Murad Ebrahim upang talakayin ang pagpapatuloy ng usapang pangkapayapaan sa Bangsamoro at ang makasaysayang ugnayan ng Ireland at ng mamamayang Bangsamoro.
Idinaos ang pagpupulong noong Nobyembre 9, 2026, sa MILF Central Committee Guest House sa Camp Darapanan, Sultan Kudarat, Maguindanao del Norte.
Pinangunahan ni Ambassador Hickey ang delegasyon na personal namang tinanggap ni Murad.
Kabilang sa mga dumalo sina Monica McWilliams, akademiko at dating miyembro ng Legislative Assembly of Northern Ireland, gayundin ang mga kinatawan ng Conciliation Resources at Irish Embassy.
Sa kanilang pag-uusap, inihambing ang kasaysayan ng pakikibaka ng Ireland para sa kalayaan sa matagal nang adhikain ng mamamayang Bangsamoro na makamit ang sariling pagpapasya o self-determination.
Napag-usapan din ang mga pagsubok, sakripisyo at paghihirap na pinagdaanan ng dalawang mamamayan sa pagsusulong ng kanilang kalayaan at pagkilala sa sariling pagkakakilanlan.
Ibinahagi rin ni Ambassador Hickey ang kanyang mga alalahanin tungkol sa pagpapatuloy ng peace process at ang ganap na pagpapatupad ng Comprehensive Agreement on the Bangsamoro o CAB.
Bilang tugon, binigyang-diin ni Murad na mahalaga ang tuloy-tuloy at tapat na pagtutulungan ng MILF at ng pamahalaan ng Pilipinas upang maisakatuparan ang mga napagkasunduang bahagi ng kasunduan.
Ayon sa kanya, hindi maaaring iasa sa iisang panig lamang ang tagumpay ng peace agreement. Kailangan dito ang kapwa paninindigan, political will at katapatan sa mga obligasyong napagkasunduan.
Sa huli, muling nabigyang-diin sa pagpupulong ang kahalagahan ng patuloy na diyalogo at pagtutulungan upang mapanatili ang usapang pangkapayapaan at maisulong ang pangmatagalang kapayapaan sa Bangsamoro Region.
