Usa ka bag-ong proyekto alang sa sektor sa edukasyon ang gipaabot nga ipatuman sa Zamboanga Sibugay National High School, diin pagatukuron ang usa ka state-of-the-art nga tulo ka andana nga building nga adunay 12 ka classrooms.
Kini nga proyekto gipatuman pinaagi sa pakigtambayayong sa Philippine Amusement and Gaming Corporation o PAGCOR, nga nagtumong sa pagdugang sa classroom facilities ug paghatag og mas komportable ug maayong lugar alang sa pagkat-on sa mga estudyante.
May kalabotan niini, gipadala na ang team ni Zamboanga Sibugay 2nd District Representative Doc Marly Hofer T. Hasim aron mouban sa mga personnel sa PAGCOR sa pagbisita ug pag-inspeksyon sa project site, ingon man sa paghisgot sa mga sunod nga lakang alang sa pagpatuman sa proyekto.
Gipasiugda sa kongresista ang kamahinungdanon sa pagpalig-on sa mga partnership aron mapadaghan ang classrooms, mapaayo ang mga pasilidad sa eskwelahan ug masiguro nga adunay maayong learning environment ang mga estudyante sa Distrito Dos.
Photo courtesy:Zamboanga Sibugay National High School| FB page
