Gipahigayon ang turnover ceremony sa financial assistance alang sa rehabilitasyon sa Traditional Madaris sa probinsya sa Zamboanga Sibugay, isip kabahin sa padayong paningkamot nga mapalig-on ang Islamic education ug mapauswag ang mga pasilidad nga gigamit sa mga estudyante sa mga madaris.
Nanguna sa maong kalihokan si Provincial Governor Dulce Ann K. Hofer, kauban si Zamboanga Sibugay 2nd District Representative Marlesa o mas nailhan nga Doc Marly Hofer-Hasim, ug Vice Governor RicRic Olegario. Mitambong usab si AKBAYAN Partylist Representative Haima o Dada Kiram-Ismula, ug National Commission on Muslim Filipinos Secretary Sheikh Sabuddin N. Abdurahim.
Lakip usab sa mga nitambong ang mga lider sa komunidad sa Muslim, lakip si Dir. Habib Madzmo H. Hasim, Presidente sa Council of Elders of Zamboanga Sibugay, Dir. Benrajiv Kashim sa NCMF, ug NCMF Region IX Regional Director Rhoaisa S. Matolo-Mukarram.
Pinaagi sa maong inisyatibo, gilauman nga mapalambo ang mga pasilidad sa Traditional Madaris aron mahatagan ang mga estudyante og mas maayong palibot sa pagkat-on, samtang mapreserbar ang Islamic education, kultura ug tradisyon. Nagpakita usab kini sa panaghiusa sa provincial government, NCMF ug AKBAYAN Partylist sa pagpalig-on sa edukasyon ug paghatag og suporta sa komunidad sa Muslim.
