Nadakpan ang 26 ka indibidwal sa gipakusgang kampanya batok sa kriminalidad sa Iligan City Police Office o ICPO ning miaging semana nga nikabat sa kapin 13.17 milyon ang kinatibuk-ang kantidad sa mga nasakmit nga ilegal nga droga, smuggled cigarettes ug mga gamit sa ilegal nga sugal.
Subay sa report sa kapulisan, 15 ka indibidwal ang gidakop tungod sa ilegal nga sugal, samtang 11 ka mga wanted person ang nasikop pinaagi sa nagkadaiyang operasyon.
Narekober usab sa mga awtoridad ang 54.94 gramos nga gidudahang ilegal nga droga nga adunay Standard Drug Price nga 373,594 pesos lakip ang upat (4) ka loose firearms isip kabahin sa kampanya batok sa pagkaylap sa mga armas nga walay lisensiya.
Dugang niini, nasakmit usab ang mga smuggled cigarettes nga gibanabanang mokabat sa 780 mil ang kantidad ug 12 milyon ang gibanabanang kantidad sa mga nakumpiskang gamit nga may kalabotan sa ilegal nga sugal.
Gipadayag sa ICPO nga gipadayon niini ang hugot nga operasyon batok sa ilegal nga droga, sugal, loose firearms, mga wanted person ug smuggling sa sigarilyo ubos sa pagpangulo ni City Director PCOL Jeffrey B. Bilaro.
Photo Courtesy: ICPO
