Dako nga tabang sa pagpalambo sa produksyon sa panguma ang moabot sa dakbayan sa Valencia human nagpahigayon og Memorandum of Agreement (MOA) signing ang Department of Agriculture – Regional Field Office 10 (DA-RFO 10) ug ang Kagamhanang Lokal sa Valencia ning bulan sa Nobyembre 2026 alang sa paghatag og ₱6.56 milyon nga balor sa mga kagamitang pang-agrikultura.
Ang maong pondo alang sa makinarya naggikan sa Corn Program ug Rice Program CY 2025 sa kagamhanan aron mas mapalig-on ang mekanisasyon sa agrikultura sa maong dakbayan.
Ubos sa Corn Program, makadawat ang LGU Valencia og usa ka 4WD farm tractor ug hauling truck, samtang makadawat og corn mill ang MS Corn Growers Association ug corn sheller ang Mt. Nebo Agricultural Cooperative. Sa bahin sa Rice Program, duha ka walk-behind transplanter ang igahatag sa Camiling-Malwak Pinatilan Irrigators Association Inc. ug Araneta Farmers Agrarian Reform Beneficiaries Association Multi-Purpose Cooperative (AFARBAMCO).
Gitahasan ang DA-RFO 10 sa pagpalit, paghatod, paghatag og teknikal nga pagbansay, ug pagmonitor sa mga kagamitan, samtang ang LGU Valencia ug ang mga benepisyaryong kooperatiba maoy manguna sa operasyon, seguridad, ug pagmentinar sa mga makinarya aron mas mapauswag ang produksyon ug panginabuhian sa mga lokal nga mag-uuma.
Photo courtesy:DA-RFO 10
