Mikunhod og 32 porsyento ang focus crimes sa tibuok nasud gikan Hulyo hangtod Oktubre 2026, kon itandi sa samang panahon niadtong 2025.
Base sa datos sa Philippine National Police (PNP), mikabat sa 9,047 ang natalang insidente karong tuiga nga mas ubos og 4,354 kumpara sa 13,401 ka kaso sa miaging tuig.
Matud ni PNP Chief Police General Jose Melencio Nartatez Jr., niadtong Oktubre lamang, mikabat sa 2,295 ang kaso, kumpara sa 3,375 sa samang bulan niadtong 2025. Lakip sa focus crimes ang murder, homicide, physical injury, rape, robbery, theft, motor vehicle theft ug motorcycle theft.
Samtang sa kampanya batok ilegal nga droga, nakahimo ang PNP og 5,101 ka operasyon niadtong Oktubre, nga miresulta sa pagdakop sa 5,788 ka indibidwal ug pagkumpiska sa ilegal nga droga nga nagkantidad og P192 milyon.
Photo courtesy: PNA
