Gipalig-on ang kahibalo sa labing menos 50 ka miyembro sa Bantay Dagat gikan sa pito ka lungsod ug dakbayan sa Northern Negros pinaagi sa lima ka adlaw nga pagbansay sa marine law enforcement aron mas mapanalipdan ang kadagatan sa Tañon Strait Protected Seascape.
Gihimo ang training gikan Nobyembre 9 hangtod 13 sa Consuelo Alger Community Center sa San Carlos City, nga gipasiugdahan sa Rare Philippines uban sa San Carlos City Coastal Resource Management Office.
Gitun-an sa mga partisipante ang hustong proseso sa pagdakop sa mga molapas sa balaod sa pangisda, pagdumala sa ebidensya, pagpasaka og kaso ug ilang legal nga gahum ug limitasyon.
Gipahinumdoman ni Sangguniang Panlungsod Member Arthur A. Batomalaque ang mga Bantay Dagat nga sundon ang hustong legal nga proseso aron malikayan ang mga reklamong mahimong ipasaka batok kanila.
Gipasiugda usab ni Rare Philippines Senior Manager Christopher Rey Cadiz nga gikinahanglan ang igong kahibalo sa mga Bantay Dagat tungod kay sila gideputize sa ilang tagsa-tagsa ka mayor aron motabang sa pagpatuman sa balaod ug pagpanalipod sa kadagatan.
Photo courtesy: San Carlos City, Neg. Occ. -LGU Information Page
