Gipahigayon ang ikatulong hugna sa Dealers and Coordinators Christmas Party sa sa Barangay Suarez, Iligan City Oktubre 28, 2026, nga gisalmotan sa mga dealers, coordinators, guests, ug mga cluster head sa Juander Radyo Loyalista Incorporated Iligan City ug Lanao del Norte.
Gitambongan ang kalihukan nila ni Richard S. Villaronte, President and Chief Executive Officer sa RSV Group of Companies Incorporated; Maria Luz Egdane-Agsaluna, Vice President for Operations sa RSV Broadcasting Network Incorporated; ug Cherelyn L. Bautista-Israel, Vice President for Operations sa RSV Lifecare Marketing Incorporated.
Nahimong highlight sa kalihukan mao ang paghatag sa mga dagkong premyo sama sa Major Prizes, si Judith Bohol nga taga-Dalipuga, Iligan City swerting nadawat ang 3rd Prize nga Screen TV, samtang and 2nd Prize nga speaker nakuha ni Corason Alinsonorin nga taga-Bunawan, Iligan City; ug sa 1st Prize nga motorsiklo nakuha ni Jelly Arivalo.
Atol sa selebrasyon, nagpaambit sa mensahe si sir Richard Soriano Villaronte diin iyang gipasabot ang duha ka mahinungdanong kahulogan sa Pasko—ang paghinatagay uban sa dakong gugma ug ang pagpasaylo sa usag-usa.
Dugang pa niini, sayo man nga gipahigayon ang kalihukan bisan wala pa moabot ang Disyembre apan ang tinuod nga diwa sa Pasko dili lamang ang pagsaulog niining panahona sa maong bulan, kondili ang pagpakita sa gugma, pagkamanggihatagon ug pagpasaylo sa matag adlaw, subay sa mga pagtulon-an sa Balaang Kasulatan.
Samtang sa pikas nga bahin, misamot ang kalipay sa mga nanambong tungod sa mga pasundayag sa mga artista sa Juander Radyo Drama Production Center nga naghatag og lingaw pinaagi sa ilang live drama presentation.
Gawas sa mga dagkong premyo, adunay mga radyo nga gipanghatag pinaagi sa raffle draw aron magamit sa mga nakadaog sa pagpaminaw sa mga programa sa Juander Radyo Iligan.
Ang maong tinuig nga kalihukan gihimo isip pagpasalamat ug pagpasidungog sa kakugi, dedikasyon ug suporta sa mga dealer ug coordinator nga dakong bahin sa kalihokan sa estasyon.
Mapasalamaton usab si Shiraz Legazpi P. Sipsip, Station Manager sa Juander Radyo Iligan ngadto ni CEO/President Richard Soriano Villaronte tungod sa dakong suporta niini sa malampusong pagpahigayon sa selebrasyon.
Gipasalamatan usab ang Juander Radyo Iligan sa tanang mga dealer ug coordinator sa ilang padayon nga pagsuporta ug paggahin og panahon aron motambong sa maong Christmas party.
Malipayon nga nanguli ang mga partisipante human sa usa ka adlaw nga puno sa kalipay, panag-ubanay, mga pasundayag ug mga premyo, nga nagpahinumdom sa tinuod nga diwa sa Pasko—ang gugma, paghatagay ug pagpasaylo.
