Giangkon sa Pagadian City Fishport nga dako ang epekto sa kanunay nga pagpanakop sa mga personahe sa Land Transportation Office (LTO) Pagadian sa ihap sa mga fish vendor nga mamalit og isda sa ilang pasilidad.
Sa eksklusibong pakighinabi sa Juander Radyo Pagadian News Team kang OIC Fishport Manager Teresita “Nday” Lapetan, iyang gibutyag nga namatikdan ang pagkunhod sa ihap sa mga fish vendor nga naggamit og habal-habal ug naggikan sa nagkadaiyang lungsod aron mamalit og isda sa Pagadian City Fishport.
Matod ni Lapetan, usa sa mga hinungdan niini mao ang kakulang sa dokumento sa ilang mga sakyanan, hinungdan nga nagduha-duha na ang ubang vendor sa pag-adto sa fishport tungod sa kahadlok nga maabtan sa operasyon sa LTO enforcers.
Bisan pa niini, malaumon si Lapetan nga mahatagan ug pagtagad ang kabalaka sa mga fish vendor aron dili maapektuhan ang ilang panginabuhian ug ang padayon nga paglihok sa negosyo sa isda sa Pagadian City Fishport.
Una nang giingon ni Lapetan nga daghan nang mga panagatan ang ni-withdraw nga mudunggo sa Pagadian City Fishport gumikan sa kamahal sa krudo ug sa naminusan nga ihap nga mga fish vendor nga musulod sa fishport Pagadian.
