Opisyal nang nakahuman sa walo ka adlaw nga Environment and Natural Resources Academy (ENRA) Frontline Course ang 33 ka personnel sa Department of Environment and Natural Resources (DENR) Region VIII human sa ilang pagbansay sa pagpalambo sa kahibalo, kahanas, ug kooperasyon sa paghatag og serbisyo publiko.
Tumong sa maong pagbansay nga mapalambo ang teknikal nga kapasidad sa mga personnel ug mapataas ang kalidad sa pag-atiman sa publiko. Lakip sa mga hilisgutan sa kurso ang mga nag-unang balaod sa palibot ug natural nga kahinguhaan, mas paspas nga pagproseso sa mga permiso, pagdumala sa yuta, kalasangan, ug pagpanalipod sa biodiversity o nagkadaiyang matang sa kinabuhi.
Kabahin ang ENRA Frontline Course sa programa sa Human Resource Development Service sa DENR alang sa pagpalambo sa kapasidad sa mga kawani. Pinaagi niini, gilauman nga mas mapauswag ang episyente, transparent, ug matinabangong serbisyo sa mga personnel sa rehiyon, samtang gipadayon ang pagpanalipod sa kinaiyahan ug mga ekosistema.
