Nadakpan sa mga operatiba sa Ormoc City Police Office (OCPO) ang usa ka giila nga High-Value Individual (HVI) nga giilang si alyas “Bodik,” 41 anyos, usa ka helper ug residente Purok 3, Barangay Doña Feliza Mejia, Ormoc City atol sa buy-bust operation nga gipahigayon didto sa naasoy nga lugar kagahapong adlawa.
Narekober sa operasyon ang pito ka transparent plastic sachet nga adunay puti nga kristal nga substansiya nga gidudahang shabu, nga may kinatibuk-ang gibug-aton nga 2.68 gramos ug gibanabanang kantidad nga ₱18,224, base sa Dangerous Drugs Board (DDB). Nakuha usab sa mga operatiba ang ubang mga butang, lakip ang personal nga mga kabtangan sa suspek ug boodle money.
Gimarkahan ug giimbentaryo ang tanang nakumpiskang ebidensiya sa lugar sa pagkadakop, atubangan sa suspek ug sa gikinahanglang mga saksi, subay sa gitakdang mga pamaagi sa balaod.
Gipahibalo usab ang suspek sa iyang mga katungod ubos sa Miranda Doctrine sa pinulongang iyang nasabtan sa wala pa siya gidala sa OCPS1 alang sa dokumentasyon ug hustong disposisyon.
Samtang, ang suspek mag-atubang og kaso tungod sa giingong paglapas sa Sections 5 ug 11, Article II sa Republic Act No. 9165, o Comprehensive Dangerous Drugs Act of 2002.
Photo courtesy: PNP Ormoc City Police Office
