Gi-turnover sa mga Barangay Public Safety Officer (BPSO) ngadto sa Malaybalay City Police Station ang 39-anyos nga lalaki nga taga-Purok 1, Barangay Poblacion, Impasug-ong human giingong suspek sa pagpanunggab niadtong nakalabay nga adlaw.
Base sa inisyal nga imbestigasyon, misulod ang suspek sa balay sa 39-anyos nga biktima sa Purok 3, Barangay Patpat sa nahisgutang dakbayan aron komprontahon ang asawa sa biktima nga kanhi niya uyab, ug didto nagsinumbagay pagkahuman gihulbot sa suspek ang kutsilyo gikan sa iyang sling bag dayong gidunggab ang biktima makatulo ka higayon sa liog, wala nga abaga, ug wala nga kamot niini.
Human napakalma ang kagubot, boluntaryong mitahan ang suspek sa BPSO, samtang ang biktima daling gidala sa Bukidnon Provincial Medical Center (BPMC) ug anaa na sa luwas nga kahimtang.
Kasamtangang anaa sa kustodiya sa Malaybalay CPS ang suspek uban ang narekober nga kutsilyo alang sa tukmang dokumentasyon ug pagpasaka sa kaso, samtang padayon usab ang gihimong ocular investigation ug pagkuha og dugang impormasyon sa maong insidente.
Photo courtesy: Malaybalay City Police Station
