Gidawat sa lokal nga pangagamhanan sa Ipil, pinaagi sa Municipal Social Welfare and Development Office o MSWDO, ang mga delegado gikan sa Zamboanga City Paralegal Volunteers ug mga representante sa Katilingban sa Kalambuan Organization, Inc. o KKI alang sa tulo ka adlaw nga learning exchange and capacity enhancement activity nga nagtumong sa pagpalig-on sa pagpanalipod sa mga bata sa komunidad.
Tumong sa maong kalihokan ang pagpaambit sa kahibalo ug maayong pamaagi aron mapanalipdan ang mga bata batok sa pagpang-abuso, pagpahimulos, human trafficking, ug uban pang matang sa kapintasan. Sukad pa sa tuig 2023, nakigtambayayong ang LGU Ipil ug ang KKI pinaagi sa Project ALERT aron mapalig-on ang mga mekanismo sa pagpanalipod sa kabataan sa lima ka barangay ug lima ka pampublikong elementaryang eskwelahan sa munisipyo.
Pinaagi niini nga kalihokan, gilauman nga mas mapalambo ang kapasidad ug koordinasyon sa lokal nga pangagamhanan, mga barangay, eskwelahan, ug mga kauban sa komunidad sa pag-ila sa mga risgo, pagreport, ug hustong pagresponde sa mga kaso nga nagkinahanglan og proteksyon.
Gipasiugda sa LGU Ipil nga ang pagpanalipod sa mga bata responsibilidad sa tibuok komunidad. Busa, padayon ang ilang paningkamot sa pagpalig-on sa mga programa ug mekanismo aron masiguro ang kaluwasan, katungod, ug kaayohan sa matag bata.
