Upat ka wanted person ang nadakpan sa Police Regional Office 12 (PRO 12), samtang duha ka persons nga anaa na sa prisohan ang gipahamtangan og warrant of arrest sa lain-laing operasyon sa rehiyon gikan alas-6 sa buntag niadtong Oktubre 24 hangtod alas-5:59 sa buntag Oktubre 25, 2026.
Lakip sa nadakpan ang Top 10 Regional-Level Most Wanted Person nga gi-aresto sa Koronadal City Police Station ug mga kaubang yunit alas-4 sa hapon niadtong Oktubre 24 tungod sa kasong rape, diin walay girekomendang piyansa sa korte.
Laing tulo ka wanted person ang nadakpan sa managlahing operasyon sa Banga ug Surallah sa South Cotabato, ug sa General Santos City.
Sa Banga, nadakpan ang usa ka indibidwal tungod sa giingong paglapas sa Republic Act 10591 o Comprehensive Firearms and Ammunition Regulation Act, nga adunay girekomendang piyansa nga 10 mil pesos.
Sa Surallah, laing indibidwal ang gidakop tungod sa giingong paglapas sa Republic Act 11313 o Safe Spaces Act, nga adunay girekomendang piyansa nga 24 mil pesos.
Samtang sa General Santos City, gidakop sa mga personahe sa Police Station 4 ang usa ka wanted person nga giatubang ang tulo ka counts sa rape by sexual assault, nga adunay kinatibuk-ang girekomendang piyansa nga 360 mil pesos.
Dugang niini, duha ka indibidwal nga anaa na sa Sarangani Provincial Jail ang gipahamtangan og warrant of arrest sa kasong syndicated estafa sa Alabel, Sarangani Province, diin walay girekomendang piyansa.
Gipamatud-an usab sa Glan Municipal Police Station ang report sa pagkamatay sa duha ka subject sa warrant records human makadawat og death certifications gikan sa ilang tagsa-tagsa ka barangay.
Photo courtesy:PRO 12
