Puno sa kalipay ug pasalamat ang mga lolo ug lola sa tibuok probinsya atol sa gipahigayon nga Senior Citizens Congress 2026 subay sa pagsaulog sa National Elderly Filipino Week niadtong Oktubre 23, 2026 sa Kaamulan Open Theater, Malaybalay City, nga nagdala sa tema nga “Nakatandang Pilipino, May Halaga at Karapatan, May Boses at Ambag sa Bayan”.
Sa mensahe ni Gobernador Rogelio Neil P. Roque, gihatagan niini og hustong pag-ila ug pasidungog ang dako nga kontribusyon sa mga katigulangan sa katilingban. Gipunting sa gobernador nga ang mga senior citizen nagpabilin nga bililhong sakop sa katilingban nga dunay mga katungod nga kinahanglang panalipdan, mga tingog nga angay paminawon, ug mga kontribusyon nga padayon nga nagkinahanglan og pagtagad
Gidayeg ug gipasalamatan sab ni National Commission of Senior Citizens (NCSC) Region 10 Director Mary Jean H. Asum ang pamunoan sa lalawigan ug ang Provincial Social Welfare and Development Office (PSWDO) sa paghatag og ₱10,000 cash award sa mga naga-edad og 80, 85, 90, ug 95 anyos, ingonman ang ₱100,000 nga insentibo alang sa mga centenarian nga adunay dugang ₱50,000 matag tuig.
Gipasalig sa kagamhanang provincial nga magpabilin silang committed sa paghatag og suporta, healthcare services, ug seguridad sa panglawas ug pinansyal. Kining tanan gihimo aron masiguro nga matagamtaman sa mga senior citizen sa Bukidnon ang ilang golden years nga adunay dignidad, kalinaw sa huna-huna, ug hustong pag-atiman gikan sa gobyerno.
Photo courtesy: LGU – Bukidnon
