Gisuspende ang klase sa duha ka dagkong tunghaan sa Barangay Casisang, Malaybalay City kagahapong adlawa, Oktubre 26, human makadawat og hulga pinaagi sa social media nga gitumong batok sa usa ka magtutudlo. Ang mga naapektahang eskuwelahan mao ang Bukidnon National High School – Senior High School Campus ug ang Casisang Integrated Elementary School.
Aron masiguro ang kaluwasan sa mga estudyante, magtutudlo, ug mga kawani, gilayon nga nagpatuman og lakang ang Barangay Public Safety Office (BPSO) sa Casisang kauban ang kapulisan pinaagi sa pagpataas ug pagpahugot sa seguridad sa palibot sa maong mga tunghaan.
Sa pakighinabi sa Juander Radyo Malaybalay ngadto kang PLTCOL Ariel Philip Pontillas, Officer-in-Charge sa Malaybalay City Police Station, gibutyag niini nga nakigtambayayong na sila sa mga cybercrime investigator aron mailhan ang responsable sa maong bahad diin nagkinahanglan kini sa makuting proseso tungod kay daling gideactivate sa suspek ang gigamit nga dummy account.
Gisubay na usab ang mga posibleng suspek, lakip ang mga estudyanteng adunay panagbangi sa maong magtutudlo, samtang nanawagan ang kapulisan sa publiko nga likayan ang paghimo og mga hulga sa social media nga makahatag og kabaka sa katilingban.
Photo courtesy: PNP -Malaybalay City
