Nakabawi og kusog ang defending champion TNT Tropang 5G human niini gipildi ang top-seeded Magnolia Hotshots, 92-70, sa unang duwa sa quarterfinals sa PBA Season 50 Governors’ Cup niadtong Domingo, Oktubre 25, sa Ynares Center sa Antipolo.
Nanguna sa kadaugan si import Rondae Hollis-Jefferson nga nakapuntos og 26, dugang sa siyam ka rebounds, lima ka assists ug tulo ka steals.
Mitabang usab sa opensa sa TNT si Calvin Oftana nga adunay 13 puntos, samtang si Roger Pogoy ug Rey Nambatac nakadugang og 12 puntos matag usa. Si Brandon Ganuelas-Rosser mitampo usab og 11 puntos. Nanguna ang TNT sa tibuok duwa ug nakapalapad sa ilang labaw ngadto sa 25 puntos, nga nakapahunong sa unom ka sunod-sunod nga kadaugan sa Magnolia.
Sa bahin sa Hotshots, si import KJ Buffen maoy nanguna sa puntos nga adunay 18, gisundan ni Zavier Lucero nga nakarekord og 14 ug Mark Barroca nga adunay 11 puntos. Pinaagi niini, nakuha sa TNT ang 1-0 nga labaw sa ilang best-of-five quarterfinal series.
Ang ikaduhang duwa sa duha ka team gikatakdang ipahigayon karong Miyerkules, sa maong venue, diin paningkamotan sa Magnolia nga makabawi ug patas ang serye.
Photo courtesy: PBA IMAGES
