Mobalik sa Japan ang Cebu based nga boksidor ug WBO Asia-Pacific super bantamweight champion Gabriel Santisima, alang sa iyang sunod nga title defense batok sa Japanese fighter nga si Kaitao Yamasaki sa Disyembre 6 sa Osaka, Japan.
Gipahibalo sa Sanman Boxing ang maong panagsangka pinaagi sa ilang social media page. Misikat si Santisima human niya gipildi pinaagi sa unanimous decision ang Japanese boxer nga si Subaru Murata sa Tokyo aron makuha ang regional title. Karon, naa siya sa ika-pito nga ranggo sa World Boxing Organization o WBO.
Adunay rekord si Santisima nga 11 ka daog, usa ka pildi ug usa ka tabla, lakip ang walo ka knockout. Sa iyang kataposang depensa sa titulo niadtong Hulyo, gipukan niya si Marsolo Pandian sa unang round.
Samtang, si Yamasaki adunay 11 ka daog, duha ka pildi ug usa ka tabla, nga naglakip sa unom ka knockout. Gilaoman nga mahimong dakong pagsulay alang sa sugbuanong kampyon ang maong panagsangka samtang paningkamotan niyang mapabilin ang iyang titulo ug mapalig-on pa ang iyang ranggo sa kalibotan.
Photo Courtesy:Sports PH
