Gipaningkamotan sa Department of Public Services (DPS) sa Dakbayan sa Sugbo nga maandam ug mapabiling limpyo ang mga sementeryo sa dili pa ang Undas pinaagi sa sunod-sunod nga operasyon sa pagpanglimpyo subay sa direktiba ni Cebu City Mayor Nestor Archival.
Sa ikaupat na ka adlaw sa operasyon, gilimpyohan na sa DPS ang mga sementeryo sa Talamban, Cabantan, Carreta ug Calamba.
Lakip sa mga gihimo ang pagtangtang sa mga sagbot ug basura aron masiguro ang kahapsay ug kalimpyo sa mga sementeryo sa dili pa modagsa ang mga tawo nga mobisita sa ilang mga minahal nga namatay.
Giawhag usab sa DPS ang publiko nga magmatngon sa hustong paglabay sa basura ug makigtambayayong sa pagmintinar sa kalimpyo sa mga sementeryo aron mahimong hapsay ug luwas ang pagsaulog sa Undas.
Photo Courtesy: Photo Courtesy: DPS/Fb page
