Nakaabot sa rekord nga US$64 bilyon ang exports sa Pilipinas sa unang walo ka bulan sa 2026, tungod sa pagtubo sa industriya sa electronics ug semiconductors. Sumala ni Executive Secretary Ralph Recto, nagkadako na ang papel sa Pilipinas sa global technology supply chain, busa gidasig sa gobyerno ang dugang pamuhunan sa chip design, engineering ug research.
Base sa Philippine Statistics Authority, niabot sa US$9.1 bilyon ang exports sa Agosto, ang pinakataas sulod sa 35 ka tuig. Ang electronics maoy 68 porsiyento niini, samtang misaka og 26.2 porsiyento ang electronics exports gikan Enero hangtod Agosto. Gilaoman usab nga motubo og 10 porsiyento ang exports karong 2026 tungod sa nagkadakong panginahanglan sa artificial intelligence (AI) ug data centers.
Gilaoman nga makadugang og 3,000 ka trabaho ang pagpalapad sa operasyon sa Toshiba sa Pilipinas sa sunod tulo ka tuig. Tumong sa bag-ong industry roadmap nga maabot sa US$110 bilyon ang tinuig nga exports sa 2030, uban sa pagpalambo sa semiconductor ug electronics manufacturing ug pagtukod og mga technology hub aron madugangan ang pamuhunan ug oportunidad sa trabaho alang sa mga Pilipino.
Photo courtesy:PNA
