Gibutyag sa World Bank ang pagreporma una sa mga balaod ug proseso sa gobyerno sa dili pa ipatuman ang digitalization sa mga serbisyo publiko aron malikayan ang pagbalhin lamang sa hinay ug komplikadong sistema ngadto sa online platforms.
Matud ni Dobromir Christow, Senior Private Sector Specialist sa World Bank Group, dili igo ang teknolohiya aron masulbad ang mga problema nga naggikan sa dili maayong mga balaod ug regulasyon.
Gipasiugda kini ni Christow atol sa ika-11 nga tigom sa ASEAN-OECD Good Regulatory Practices Network, diin iyang gihatagan og gibug-aton ang panginahanglan nga susihon una ang mga balaod, proseso ug responsibilidad sa matag ahensiya sa gobyerno.
Giklaro usab niya nga kinahanglan ilhon sa balaod ang mga elektronikong aplikasyon, dokumento, pirma ug bayad isip katumbas sa tradisyonal nga mga pamaagi.
Gidugang sa World Bank nga importante ang koordinasyon ug pagpaambitay og datos sa mga ahensiya aron mapadali ang serbisyo publiko ug mamenosan ang palas-anon sa mga negosyo ug katawhan.
Photo courtesy: Nation Online
