Maglunsad ang Philippine Amusement and Gaming Corporation (PAGCOR) og mobile application aron mailhan sa publiko ang mga lisensyadong online gaming platform ug malikayan ang ilegal nga mga gambling site. Matud ni PAGCOR Chair ug CEO Alejandro Tengco, tumong niini nga mapalig-on ang proteksyon sa publiko batok sa ilegal nga pagpangapusta online.
Ang Philippines Data Center Incorporated (DCI) maoy modumala sa paghimo, pag-host, operasyon, maintenance ug teknikal nga suporta sa aplikasyon nga walay bayad. Apan sa dili pa kini hingpit nga ipatuman, susihon ug aprobahan una sa PAGCOR ang pasiunang bersyon sa aplikasyon.
Molungtad og unom ka bulan ang assessment aron masuta ang mga feature, security system ug posibilidad sa hingpit nga pagpatuman niini. Mahimo usab nga tapuson sa PAGCOR ang kasabutan kung dili masulbad sa DCI ang mga kakulangan o problema nga makita panahon sa ebalwasyon.
Photo courtesy: Context.ph
