Nagpakita ang Department of Trade and Industry Region 12 sang kabug-usan nga ₱32.5 milyon nga cash kag booked sales sa Treasures of Region 12 Trade Expo 2026, nga naglabaw sang 8.3 porsyento sa ila inisyal nga target nga ₱30 milyon.
Ginpatigayon ang apat ka adlaw nga trade expo halin Oktubre 15 tubtob 18 sa Ayala Malls Market! Market! sa Taguig City, nga nagpasundayag sang mga produkto sang 70 ka micro, small, and medium enterprises ukon MSMEs nga ginabuligan sang DTI-12.
Suno kay Mary Ann Morales, Acting Assistant Regional Director sang DTI-12, nagapakita ang mataas nga baligya sang ikasarang sang lokal nga mga produkto sang rehiyon nga makigkompetensya sa mas malapad nga merkado.
Lakip sa mga ginpasundayag ang tuna products, kape, tsokolate, processed tropical fruits, T’nalak nga tela, brassware kag mga fashion accessories nga hinimo sang mga lokal kag lumad nga artisan.
Samtang, ginpakilala ang 7R Coffee Production sang Sultan Kudarat kag Ombeng Handicrafts sang South Cotabato bilang Top Grosser Awardees bangod sa ila mataas nga cash kag booked sales.
Nakuha naman sang Norlind Chocolate Processing sang Cotabato Province kag Klowil Agricultural Enterprise Multipurpose Cooperative sang South Cotabato ang Product Innovation Awards.
Ginpatigayon ang expo pinaagi sa pagbinuligay sang DTI-12, mga lokal nga panguluhan kag nagkalain-lain nga ahensya agud mapalapad ang merkado kag mapabakod ang negosyo sang mga lokal nga negosyante sa SOCCSKSARGEN.
Photo courtesy:DTI-12
